أجمل إحساس في الكون..!!
كتبهاRana Badawy ، في 31 ديسمبر 2006 الساعة: 22:34 م
تفتكروا إيه هو أجمل إحساس في الكون؟انك تحب ولا تتحب؟ الإحساس بالحب ده أجمل إحساس في الدنيا…انك تحس فجأة إن في ناس بتحبك مش لغرض (لأن انت معندكش اللي تقدمه ليهم عندك ليهم حب وود…لما تلاقي فجأة في يوم العيد وانت مش متصور إن تليفونك ينطق ولو برنة من حد إلا ناس انت عارف عددهم كويس لكن فجأة تلاقي كم رسايل واتصالات من أصحاب وزمايل مكنتش تتوقع انك تكون في ذاكرتهم,,حتى لو كانت شبكات المحمول بتعمل عروض مغرية تخلي الناس تبعت لبعضها رسايل كتير وتكلم بعض كتير يكفي ان انت من ال8 اللي زميلك افتكرهم الموضوع مش موضوع مادي الموضوع معنوي… انك تحس ان في ناس فاكراك في المناسبات السعيدة شيء جميل…بجد أجمل إحساس..أنا إتفاجئت بمكالمات أسعدتني من ناس مكسوفة وأنا بقول ما خطروش على بالي يعني لو كنت فكرت اكلم ناس مكنتش افتكرتهم…تعرفوا أنا عملت فولدر في تليفوني سميته Happy Feast يعني عيد سعيد
بفتحه لقيت فيه اكتر من 20 رسالة بمناسبة العيد من ناس كتير متوقعتش إنها تفتكرني
تفتكروا ده سبب يخليني أفرح؟أكيد طبعا يخليني أطير من الفرح؟ تفتكروا الإنسان ممكن يعوز إيه من الدنيا أكتر من إنه يكون محبوب؟! يكون محبوب لشخصه مش لأن في مصلحة من وراه أنا كنت بتمنى دايما تكون دعوة أمي ليا "ربنا يحبب فيك خلقه"
يمكن أمي عمرها ما دعيتلي الدعوة دي بس أنا كنت بدعيها لنفسي وكنت ومازلت بدعي ان ربنا يحبب فيا خلقه ويجعلني أهل لمحبتهم…الإنسان لازم يعيش وهو حاسس بالحب..حب الناس ليه وحبه ليهم أنا مقتنعة ان الحب ده بيكون للناس كلها..للحياة يمكن تقولوا عليا مجنونة لأن مش معقول رسالة منقولة من شخص لشخص مسببالي حالة فرح غير طبيعية بس صدقوني هو ده اللي أنا حاسة بيه حاسة إني مش عايشة والسلام… حاسة ان في ناس فاكراني وبتفتكرني وأتمنى يكون بالخير حتى لو كنت مش رقم واحد أو أتنين أو تلاتة في تفكيرهم بس يكفي إني في دماغهم ومش مجرد شخصية وعدت…
بالذمة مش هو ده أجمل إحساس في الكون؟
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
ديسمبر 31st, 2006 at 31 ديسمبر 2006 11:00 م
انا كمان مبسوطة اوى لان نفس الموضوع حصلى ويمكن جاتلى رسايل فوق ال 25 رسالة الحمد لله
ويمكن دى كمان الحاجة الوحيدة اللى حسستنى بالعيد وفرحته اللى بقالى سنين وسنين محستش بيها وخلتنى استغنى غن اى بديل زى الخروج والفسح والسفر
والحمد لله لسة لحد الدقيقة دى ناس فكرانى وبتبعتلى مرة واتنين و10
ومش لازم الحكاية دى تبقى فى العيد وبس كمان انا شفتها قبلها لما غبت كام يوم عن الناس
فعلا احساس رائع مايتوصفش
يناير 17th, 2007 at 17 يناير 2007 4:08 م
فعلا بيبقى احساس جميل اوى يا سوسه انتى ورنا
لكن يمكن الموضوع بيختلف من عيد لعيد ومن ظرف لظرف يعنى بعد الجواز الموضوع عندى بقه احلى واحلى خصوصا فالعيد الصغير لان الناس فيه بتبقى فاضيه على عكس الكبير من دبح وكده
بس احلى حاجه لما الاقى الاطفال الصغيرين طلعين عندى بهدومهم الجديده يفرجونى عليها والتليفون ميبطلش رن
والبيت كله يتجمع ونعيد على بعض ونضحك ونهزر ويبقى يوم مش عادى ولازم اورع على الاطفال بلالين بحس بمتعه كمان نفرقع صوارخ ونلعب وهنزر
بجد يوم العيد ده بيبقى متعه
احلى حاجه فيه اللمه والزيارات والضحك والتليفونات
بحس انه هو ورمضان الايام الوحيده الى الناس بقت بتسال عن بعض فيهم وتتلم مع بعض فيهم
يارب يكون ايام السنه كلها زى الاعياد والناس بتفتكر وتسال عن بعض دايما
انا حسه انى خرجت بره الموضوع يالا مش مشكله ههههههههههههههههههههه
يناير 25th, 2007 at 25 يناير 2007 10:22 ص
ربنا يسعدك اكتر واكتر يا رنا
ويحبب فيكي خلقه
وبجد انتي عارفة اياميها اللي حصل وانا قلتلك وفهمتك
فبراير 8th, 2007 at 8 فبراير 2007 4:35 ص
انا فرحان عشان كتبتى حاجة متفائلة
فبراير 10th, 2007 at 10 فبراير 2007 2:17 م
أنا مبسوطة ان اللي ردوا عليا 4 من أقرب أصحابي ليا
سوسة حبيبتي يارب دايما تحسي انك محبوبة
أسماء ازيك يا سكر ويارب دايما حياتك أعياد وسعادة يارب
كريم.زولا يهمك وميرسي جدا ليك ولاهتمامك
تهامي…تصور أول مرة أخد بالي اني مش بكتب متفائل؟!! ادعيلي انت بس وانا اكتب دايما بتفاؤل
ميرسي جدا جدا ليكم كلكم
فبراير 25th, 2007 at 25 فبراير 2007 12:03 م
عوز اعرف حاجه هى اسماء هى اللى كتبا الكلام الجميل ده
أبريل 18th, 2007 at 18 أبريل 2007 1:01 ص
مين المجهول ده طيب ههههههههههههه
أغسطس 27th, 2008 at 27 أغسطس 2008 7:01 م
اوك انا موفقة بس صعب انا تحب ومش تتحب اصعب احساس هو دة الى انا فى بحب ومش حد بيحبنى مش عارفة لة
أكتوبر 10th, 2008 at 10 أكتوبر 2008 6:01 م
السلام عليكم ورحمة الله وبركاته
وكل عام وانتم جميعا بألف خير ،
الحقيقة العنوان شدني بجد عشان اكتب رأيي فيه موضوع حلو جدا وشيق جدا وكل واحد مننا ممكن يقول احساسه بصدق وبصراحة وممكن نكون اضافة لغيرنا من الزملاء ، لإن المفروض كلنا بنحس ببعض .
اجمل احساس في الكون بالنسبة لي :
(1) اتعامل مع ناس كويسة يحسسوكي بقيمتك وبقدرك ويحترموكي من جواهم .
(2) لما اولادي بيجيبوا الشهادة ويقولولي نجحنا يا ماما .
(3) لما اولادي يطلبوا مني فلوس ويكون معاية .
(4) لما اعمل شىء لله والناس بتدعيلي من قلوبهم .
(5) لما ربنا بيبعتلي رزقي ورزق عيالي ونكون ساعتها محتاجين الفلوس دي
(6) لما اشوف الحب ف عيون اولادي وعيون الناس اللي باتعامل معاهم بيقولوا ماتبعديش عننا
(7) لما اشوف جوزي بيحبني من قلبه ومحسسني اني احسن زوجة في الدنيا.
(8) لما اغطي بناتي بالليل واطبطب عليهم واطمن انهم دفيانين .
(9) لما اكون مكسورة وضعيفة وابص للسماء انادي على ربنا واناجيه واتذلله عشان يساعدني
(10) لما اكون راضية عن نفسي قدام ربنا سبحانه
(11) لماحد يندهلي عشان انقذه او اساعده او اقف جنبه واكون حاسة بيه
(12) لما ابص للون السما من اسود حالك السواد لغاية الفجر ويبدأ لونها يتغير للكحلي ثم اللبني لغاية ما يطلع النهار ويبقى فاتح اوي مع همس السكون وهدوء الكون وفجأة تسمع آذان الفجر في كل المساجد وكأنه صرخة مدوية في كل اذن عشان تقوم تصلي الفجر.. وصوت الديك بيدن كوكو..احساس جميل جوايا مع انتعاش نسمات الصبح العليل الهواء كده فريش اوي اوي …
(13) لحظة خروج الناس للعمل بحماس ونشاط ..
(14) لحظة دخولي الحدائق وخضرة الحشائش وحسن تنسيق الورود والازهار منظر رائع جدا
(15) لهفة لقاءك لأول مرة مع شخص سمعت صوته في التليفون وبتقابله اول مرة ..
(16) لما سمعت أول مرة صوت بكاء احفادي لحظة ولادتهم .
(17) لما قلبك هو اللي يتكلم ولما عينك هي اللي تسمع في احلى لحظة صدق بين حبيبين