النهاردة 30/3 يعني نهاية شهر مارس وكلها بكرة ولا بعده ويبدأ شهر 

أبريل..السنة اللي فاتت في الفترة دي حصل موقف ضايقني قوي… السنة اللي فاتت كنت مشتركة في منتدى كلمتنا قبل ما ينتهي كان منتدى جميل والناس فيه بتحب بعض ودا كان واضح ومش محتاج إثبات أو إن حد يختبر حب الباقيين..فجأة وفي أواخر شهر مارس سمعنا إن بنت زميلتنا ع المنتدى وكلنا بنحبها تعبانة قوي وكل يوم نسأل والرد يكون انها تعبانة قوي

وفي يوم مكناش نعرف تاريخه عرفنا انها  ماتت…يا خبر  ماتت طبعا زعلنا واتضايقنا والدموع ملأت أعيننا وانهارت على المنتدى كلمات ليها ودعوات لها بالرحمة ومواضيع اتعملت ليها مخصوص تخيلوا بنت في العشرين من عمرها لذيذة ومحبوبة كنا نعرفها من خلال مشاركاتها معانا وفي مننا شافها عالحقيقة  وفي اللي كان نفسه يعرفها كويس بس خلاص البنت راحت لازم ندعيلها… فجأة لقينا حد دخل وقال يا جماعة حرام عليكم في ناس زعلت بجد وفي ناس تعبانة بسبب الموضوع ده كفاية كذب..!!

كذب..تقصدوا ان بكانا وزعلنا من قلبنا كان عشان ناس بتكذب وبتهزر؟ طب ليه؟في حد ممكن يعمل في نفسه كدة؟ طبعا كلنا استغربنا خصوصا اللي مخطرش على بالهم قصة شهر ابريل طبعا السبب كان الهزار..!! تخيلوا في ناس عشان تهزر ممكن ترسم خطط وتكذب وتفول على نفسها أو على صحابها وكل ده عشان إحنا في شهر ابريل..!! شهر الكذب..شهر السخافة والاستخفاف بالناس والمبرر انه كان هزار والبنت كانت عايزة تختبر حب الأعضاء ليها..!! تخيلوا عشان تختبر حبهم تفزع قلوبهم وتفول على نفسها

طبعا هي ندمت بعد كدة واعتذرت لنا واعترفت إن الموضوع  ده أثر فيها وخلاها تخاف من الموت وحرمت تعمل كدة تاني..بس ليه من الأول وكسبت ايه؟ كان ممكن تختبر حب الناس بطريقة تانية

قررت من بعد الموقف ده آخذ حذري وأنا بتكلم مع أي حد خصوصا عالنت في الفترة دي وطبعا  السبب معروف لأن أول أبريل بيبقى موسم الكذب والكذابين بيظهروا واللي مبيكذبش بيحاول يستعرض قدرته على خداع اللي حواليه والاستخفاف بيهم..رغم ان اغلب الأكاذيب بقت خلاص عاملة زي الأفلام الهندي القديمة اللي أتحرقت عشان قديمة إني اقول على نفسي مت أو عندي مرض أو أو أو

ياريت الناس تكبر بقى  وتبطل بدع…ياريت زي ما بنشغل مخنا ونحاول نبتكر ونخطط أزاي نكذب على الناس نفكر ونخطط عشان نبقى ناس منتجة ونافعين لنفسنا ولبلدنا نطلع طاقاتنا دي في حاجة مفيدة ولا الملل واليأس والفراغ هما اللي بيدفعونا إننا نجري ورا بدع غريبة وسخيفة مالهاش مبرر ولا معنى بس إحنا وافقنا بيها واستسلمنا ليها؟ والأدهى من ده كله إن بدعة كذبة ابريل غير معروف  اصلها يقال ان مبتدعيها هم الفرنسيين ويقال قدامى اليونان

        لما حبيت اقرا واعرف اكتر عن كذبة ابريل عملت سيرش على جوجل وانا متخيلة اني هلاقي سطرين وسط موضوع لكني اتفاجئت بمواضيع وقصص وروايات لكذبة ابريل وأصل الحكاية..!!

 الموضوع مش مجرد هزار بين أصحاب ده في دول بتحتفل بكذبة ابريل وناس كبيرة بتهتم أوي بالكذب في ابريل..!! سبحان الله الناس بتتفنن أزاي تكذب شيء مستفز!! ياترى كل دول عارفين إن ديننا نهانا عن الكذب؟عارفين إن دي بدعة لا تتماشى وديننا, لا تتماشى وعاداتنا وتقاليدنا؟!

رب ارحمنا من مثل هذه التفاهات…