بارقة أمل
كتبهاRana Badawy ، في 1 يوليو 2007 الساعة: 06:52 ص
وحشتني مدونتي ووحشتني الكتابة قوي بقالي كتير قوي مكتبتش حاجة بجد او تقريبا مكتبتش خالص
يمكن كسل..يمكن احباط..يمكن عدم ثقة في نفسي وفي اللي بكتبه..مش عارفة بالضبط ..اللي أعرفه كويس اني مبقيتش الطموحة اللي متخيلة نفسها ممكن تغير حاجة او تعمل حاجة ..ممكن اكون حلمت حلم كبير أنا مش قده وفوقت منه وعرفت اني مش موهوبة بالدرجة ومش انا اللي هعمل حاجة..زمان كنت مقتنعة بنفسي جدا وكنت بقول مسيري هعمل ليا اسم وهوصل للناس وهقدر اغير..كنت بقول مفيش مستحيل..دلوقت عرفت ان ده كان مجرد حماس وانطفى..نفسي اقدر اكتب زي زمان حتى لو من غير موهبة..حتى لو محدش هيقرالي ..المهم أفرغ طاقتي زي زمان لما مكنتش بحس بالملل..انا مبقيتش أنا معرفش ايه اللي حصلي..بس حاسة اني عندي طاقة نفسي أخرجها ادعولي أقدر أمسك قلمي وأكتب من تاني حتى لو تهييس حتى لو كلام مش مترتب حتى لو بلا معنى المهم اني ارجع احس بنفسي تاني..انا لسة عندي أمل
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
يوليو 1st, 2007 at 1 يوليو 2007 7:10 ص
فعلا انا ابتديت افرغ اللى جوايا فى المدونة بس فين برضه مش كتبتى تانى
منتظرينك
يوليو 1st, 2007 at 1 يوليو 2007 7:15 ص
لما كتبت البوست ده كنت عارفة ان محدش هيقراه لأن محدش متابع مدونتي
يمكن عشان مفيهاش جديد ويمكن عشان بنساها
بس لما لقيت حد علق بالسرعة دي استغربت وقلت أكيد حد من أصحابي متابعني
توقعت ناس معينه
لكن اتفاجئت ان اللي علق مش من اصحابي..ده اسعدني جدا..اسعدني ان يكون في حد متابع الهرتلة بتاعتي ومدونتي المتواضعة
ميرسي قوي ليك
ودعواتك ليا اني أقدر أرجع أكتب
شكرا مرة تانية عالاهتمام
يوليو 1st, 2007 at 1 يوليو 2007 10:07 ص
سيري على بركة الله في إبداعاتك وطرح المفيد
يوليو 1st, 2007 at 1 يوليو 2007 1:30 م
يارنرون ياحبيبتى مفيش حاجة فى الدنيا بتنتهى الا عشان حاجة غيرها تبتدى
وانتى فاهمة قصدى وعارفة اللى عايزة اقولهولك
اتوكلى على الله وجربى تكتبى تانى
هتلاقى حاجات كتير اتغيرت فى كتابتك ونظرتك للحياة
بس خليكى واثقة فى نفسك ده اهم شئ
يوليو 1st, 2007 at 1 يوليو 2007 4:04 م
dr.isam. m…ميرسي قوي ليك
sosa…ميرسي ياسارة انا بحاول ارجع زي الاول ادعيلي
يوليو 1st, 2007 at 1 يوليو 2007 6:28 م
نتشرف بدعوتكم للاطلاع علي نقد رقم 8
كما يسعدنا تلقي رايكم و تعليقكم الذي نعتز به كثيرا
يوليو 2nd, 2007 at 2 يوليو 2007 10:04 م
ازيك يا رنا … أنا أول مرة أخش على مدونتك، وأعلق على موضوع ليك، وعايز أقولك إن أى إنسان فى سنة موهبة فى أى مجال بتيجى عليه أيام بيكون مش طايق ينميها، وده شئ طبيعى وعادى جداً …… نصيحتى ليك إنك متسبيش نفسك لليأس لأن ده أول خطوة على طريق الفشل … وارجعى ثقى بنفسك تانى لأنك حد جميل … وكتاباتك كويسة مش وحشة أبداً ….. وادعيلى أخلص مشروع التخرج على خير
يوليو 3rd, 2007 at 3 يوليو 2007 5:51 ص
على فكره انا اسمى سحر بدوى يعنى ممكن نكون قرايب
وثقى يا ستى ان فى ناس بتقرا كلامك و يهمها رايك
اتمنى تزورينى قريب
يوليو 13th, 2007 at 13 يوليو 2007 2:08 ص
ازيك يا رنا على ما اظن اننا على معرفة قديمة !!
المهم انا متبعك ديما على فكرة
ويا ريت لو تكتبى او تعملى بلوج على موقع http://www.blogger.com هيكون المتابعة والتواصل مع باقى المدونين اكتر …
تحياتى لك ودمتى فى خير وسعادة
سلام
يوليو 13th, 2007 at 13 يوليو 2007 10:14 ص
بسم الله الرحمن الرحيم
ليه بس بتقولي كده يا رنا
و ايه اللي وصلك للمرحله دي بس
مش للدرجه دي يعني
و بعدين يا رنا دي اكيد مرحله و هتعدي
مش انتي اللي تقولي كده
انا اه مش اعرفك قوي
بس علي الاقل الكلام ده مش انتي اللي تقوليه
لا يا رنا كده استهدي بالله و هتعرفي
هتفشلي مره التانيه التالته
بس في الرابعه هتعرفي بجد
يا رنا اوعي تستسلمي للشعور ده
و اذا فعلا حاسه انك مش قادره و معزوزه
الكتابه هي اللي هتخليكي ترجعي تاني
و اوعديني بقي
اخوكي احمد صبري
يوليو 16th, 2007 at 16 يوليو 2007 11:20 ص
عاملة ايه وايه اخبارك ؟
يا ترى ليه ..كده ؟
ديسمبر 9th, 2007 at 9 ديسمبر 2007 10:31 ص
الموهبه عمرها ما بتخلص بس انتى عايزه تثقى فى نفسك اكتر وان شاء الله هترجعى تكتبى من جديد.
فى انتظااااااااااااااااااارك
مارس 4th, 2008 at 4 مارس 2008 2:53 م
ازيك يارنا
انا مش عارف سنك قد ايه …. كبيره ولا صغيره ….. بس اكيد بنت جميله ورقيقه …وحساسه…. اقولك انا دخلت على مدونتك ازاى
انا كنت بحب بنت اسمها سحر بدوى كان حب كبير بس هى اتجوت بس الكلام ده من فتره زمنيه طويله واتجوزت انا وبقى عندى عيال فى المدارس ودايما بففتكر حبى القديم …وانا قاعد عاكمبيوتر قلت لما ابحث عن اسم حبيبتى اللى اسمها سحر بدوى.. لقيت اسماء كتير اسمها سحر بدوى ,ومن ضمنهم واحده باعته بترد عليكى …بصى فوق حتلاقيها …ولقيت نفسى فى المدونه دى … ولاقيتك حزينه وشبه مكتئبه…. قلت لازم اقولك ان الدنيا بسيطه قوى بس احنا مصعبينها على نفسينا… ويمكن انا حسيت بكلماتك عشان انا من النوع المتغير المزاج … شويه احباط وشويه فرح وشويه فوق وشويه تحت …,وما باليد حيله …دى تركيبه نفسيه ربنا خلقنا بيها …يعنى كيميا زى مابيقولو
المهم ان ربنا يوفقك فى حياتك … وتكونى فى لحظات سعاده ولحظات ابداع تتطلعى اللى جواكى من خلالها ,وانشاء الله نبقى من القراء اللى بينتظرو مقالات وادب كاتبه عظيمه اسماها رنا بدوى …..وسلام
ملحوظة : انا بعتذر للانسة سحر بدوى اللى موجوده على مدونتك وبشكرها لانها السبب اللى خلتنى اعرف مدونة ساعة صفا …. وسلام للجميع